मनमाड शहरात मोकाट कुत्र्यांचा हैदोस; प्रशासनाच्या निष्क्रियतेवर नागरिकांचा संताप

पुतळे, बाजारपेठा अन् मुख्य रस्त्यांवर कुत्र्यांचे कळप; हल्ला झाल्यावरच प्रशासन जागे होणार का? — एस.एम. भाले

मनमाड : शहरातील विविध प्रभागांसह बाजारपेठा, मुख्य रहदारीचे रस्ते आणि महत्त्वाच्या सार्वजनिक ठिकाणी मोकाट कुत्र्यांची संख्या दिवसेंदिवस वाढत असून, नागरिकांच्या सुरक्षिततेचा प्रश्न ऐरणीवर आला आहे. डॉ. बाबासाहेब आंबेडकर पुतळा, छत्रपती शिवाजी महाराज पुतळा परिसरासह गर्दीच्या ठिकाणी कुत्र्यांचे कळप फिरताना दिसत असल्याने नागरिकांमध्ये भीतीचे वातावरण निर्माण झाले आहे.
एखाद्या नागरिकाला कुत्रा चावल्यानंतरच प्रशासनाची यंत्रणा हालचाल करते; मात्र हल्ला होण्यापूर्वी प्रतिबंधात्मक उपाययोजना का केल्या जात नाहीत? असा संतप्त सवाल सामाजिक कार्यकर्ते एस.एम. भाले यांनी उपस्थित केला आहे.

कुत्र्यांची संख्या वाढतच राहिली तर जबाबदार कोण?

मोकाट कुत्र्यांची वाढती संख्या ही केवळ अस्वच्छतेची समस्या नसून नागरिकांच्या जीविताच्या सुरक्षिततेशी संबंधित गंभीर बाब आहे. विशेषतः लहान मुले, ज्येष्ठ नागरिक, महिला, दुचाकीस्वार तसेच पहाटे आणि रात्रीच्या वेळी ये-जा करणाऱ्या नागरिकांना कुत्र्यांच्या टोळक्यांमुळे धोका निर्माण होत आहे.

शहरातील प्रमुख चौक, बाजारपेठा आणि रहदारीच्या रस्त्यांवर कुत्र्यांचे कळप दिसत असताना प्रशासनाने केवळ तात्पुरती कारवाई न करता या समस्येवर कायमस्वरूपी उपाययोजना करण्याची गरज असल्याचे भाले यांनी म्हटले आहे.

उच्च न्यायालयाच्या निर्देशांची गांभीर्याने दखल घ्या
भटक्या कुत्र्यांच्या वाढत्या संख्येवर नियंत्रण मिळवण्यासाठी ॲनिमल बर्थ कंट्रोल (ABC) कार्यक्रम प्रभावीपणे राबविण्याची गरज न्यायालयीन पातळीवरही अधोरेखित करण्यात आली आहे. त्यामुळे मनमाड नगरपालिकेने या प्रश्नाकडे गांभीर्याने पाहून उपलब्ध कायदेशीर व प्रशासकीय मार्गदर्शक तत्त्वांनुसार नसबंदी व संबंधित उपाययोजना युद्धपातळीवर राबवाव्यात, अशी मागणी भाले यांनी केली आहे.

“कुत्र्यांनी चावा घेतल्यानंतर उपचार करण्यापेक्षा, चावा घेण्याची वेळच नागरिकांवर येऊ नये यासाठी प्रशासनाने प्रतिबंधात्मक उपाययोजना करणे गरजेचे आहे,” असा स्पष्ट सूर त्यांनी व्यक्त केला.

नसबंदी मोहीम कागदावर नको; प्रत्यक्ष रस्त्यावर दिसली पाहिजे!

मनमाड शहरातील प्रत्येक प्रभागाचे सर्वेक्षण करून मोकाट कुत्र्यांची संख्या निश्चित करावी, त्यानंतर नियोजनबद्ध पद्धतीने नसबंदी मोहीम राबवावी. तसेच नागरिकांच्या तक्रारींसाठी प्रभावी यंत्रणा उभी करून धोकादायक ठिकाणांवर तातडीने उपाययोजना कराव्यात, अशी मागणी करण्यात आली आहे.
“प्रशासनाने आता तरी जागे व्हावे. एखादी मोठी दुर्घटना घडल्यानंतर उपाययोजना करण्यापेक्षा त्याआधीच मोकाट कुत्र्यांच्या वाढत्या संख्येला आळा घालणे आवश्यक आहे. नागरिकांच्या जीवाशी संबंधित या प्रश्नाकडे नगरपालिकेने दुर्लक्ष करू नये,” असे सामाजिक कार्यकर्ते एस.एम. भाले यांनी पत्रकाद्वारे म्हटले आहे.

आता प्रश्न एकच — नागरिकांच्या सुरक्षिततेसाठी मनमाड नगरपालिका ठोस कृती कधी करणार?