मध्यरात्री मनमाडमधील जुगार अड्ड्यावर पोलिसांचा छापा; १४ जण ताब्यात, १ लाख ९५ हजारांची रोकड जप्त

 

गुरुद्वारामागे सुरू असलेल्या जुगार अड्ड्यावर विशेष पथकाची धडक कारवाई; प्रतिष्ठित व्यक्तींच्या सहभागाच्या चर्चेने खळबळ

मनमाड : शहराच्या मध्यवर्ती भागात, मोठ्या गुरुद्वाराच्या पाठीमागे सुरू असलेल्या कथित जुगार अड्ड्यावर मालेगाव विभागाचे अपर पोलीस अधीक्षक सुरज गुंजाळ यांच्या विशेष पथकाने मध्यरात्री धडक कारवाई केली. रात्री सुमारे दीड वाजण्याच्या सुमारास करण्यात आलेल्या या छाप्यात १४ जणांना ताब्यात घेण्यात आले असून, त्यांच्याकडून तब्बल १ लाख ९५ हजार रुपयांची रोकड हस्तगत करण्यात आल्याची माहिती आहे.

मनमाड शहरातील मध्यवर्ती ठिकाणी मोठ्या प्रमाणावर जुगार सुरू असल्याची गुप्त माहिती अपर पोलीस अधीक्षक सुरज गुंजाळ यांना मिळाली होती. त्यानंतर त्यांच्या विशेष पथकाने मनमाड शहर पोलिसांच्या सहकार्याने संबंधित ठिकाणी मध्यरात्री कारवाई केली. अचानक झालेल्या या छाप्यामुळे जुगार खेळणाऱ्यांमध्ये एकच खळबळ उडाली.

या कारवाईप्रकरणी विशेष पथकातील पोलीस कर्मचारी राम मिसाळ यांच्या तक्रारीवरून १४ जणांविरोधात गुन्हा दाखल करण्यात आला आहे. कारवाईदरम्यान जुगाराच्या ठिकाणाहून १ लाख ९५ हजार रुपयांची रोख रक्कम जप्त करण्यात आली आहे.

दरम्यान, या प्रकरणात काही प्रतिष्ठित व्यक्तींचा सहभाग असल्याची चर्चा शहरात सुरू झाली असून, या चर्चेला अधिकृत दुजोरा मिळालेला नाही. त्यामुळे पोलिसांच्या तपासातून नेमके कोणाचे संबंध समोर येतात, याकडे मनमाडकरांचे लक्ष लागले आहे.

शहराच्या मध्यवर्ती भागातच अशा प्रकारचे अवैध जुगार अड्डे सुरू असल्याने पोलिसांच्या नियमित गस्तीवरही प्रश्नचिन्ह उपस्थित होत आहे. अवैध धंद्यांना नेमका कोणाचा आश्रय आहे? हे अड्डे इतके दिवस सुरू कसे राहिले? असे सवाल आता नागरिकांकडून उपस्थित केले जात आहेत.
या प्रकरणाचा पुढील तपास पोलीस निरीक्षक विजय करे यांच्या मार्गदर्शनाखाली पोलीस हवालदार झाल्टे करीत आहेत. तपासाअंती या जुगार अड्ड्याचे संचालन, आर्थिक व्यवहार आणि त्यामागील सूत्रधार याबाबत आणखी माहिती समोर येण्याची शक्यता आहे.

मध्यरात्रीची कारवाई… १४ जण ताब्यात; पण जुगार अड्ड्याचा खरा सूत्रधार कोण?

मनमाडच्या मध्यवर्ती भागात सुरू असलेल्या अवैध जुगाराविरोधात पोलिसांनी केलेली ही कारवाई निश्चितच महत्त्वाची मानली जात आहे. मात्र, केवळ जुगार खेळणाऱ्यांवर कारवाई न थांबवता या अड्ड्याच्या मुळापर्यंत पोहोचून त्यामागील सूत्रधारांवरही कठोर कारवाई होणार का, हा खरा प्रश्न आता उपस्थित झाला आहे.