मनमाडमध्ये मतदार यादी शुद्धीकरणाला वेग; एसआयआरसाठी नगरपरिषदेची विशेष सभा

 

मनमाडमध्ये मतदार यादी शुद्धीकरणाला वेग; एसआयआरसाठी नगरपरिषदेची विशेष सभा

दुबार, स्थलांतरित, मयत व पत्त्यावर नसलेल्या मतदारांची पडताळणी; नगरसेवकांच्या सहकार्याने प्रक्रिया अधिक प्रभावी होणार

मनमाड | प्रतिनिधी
मतदार यादी अधिक अचूक, पारदर्शक आणि अद्ययावत करण्याच्या उद्देशाने राज्यभर राबविण्यात येत असलेल्या स्पेशल इंटेन्सिव्ह रिव्हिजन (SIR) कार्यक्रमाच्या अनुषंगाने मनमाड नगरपरिषदेची विशेष सभा शनिवारी (दि. १ ऑगस्ट) उत्साहात पार पडली. जिल्हाधिकाऱ्यांच्या निर्देशानुसार आयोजित करण्यात आलेल्या या बैठकीत मतदार यादीतील दुबार, स्थलांतरित, मयत तसेच पत्त्यावर आढळून न आलेल्या मतदारांची सखोल पडताळणी करण्यासाठी लोकप्रतिनिधी आणि प्रशासनाने समन्वयाने काम करण्याचा निर्धार व्यक्त केला.

नगराध्यक्ष योगेश पाटील यांच्या अध्यक्षतेखाली झालेल्या या सभेला उपनगराध्यक्ष मुकुंद एलिंजे, शिवसेना गटनेते महेंद्र शिरसाठ, सर्व नगरसेवक, मुख्याधिकारी शेषराव चौधरी, उपमुख्याधिकारी बागल मॅडम, तसेच नगरपरिषद हद्दीतील ६३ बीएलओ आणि पर्यवेक्षक मोठ्या संख्येने उपस्थित होते.
उपजिल्हाधिकारी तथा उपजिल्हा मतदार नोंदणी अधिकारी श्रीमती सीमा अहिरे यांच्या मार्गदर्शनाखाली शहरात सुरू असलेल्या मतदार पुनरिक्षण मोहिमेची सविस्तर माहिती यावेळी देण्यात आली. मतदार यादीतील Already Enrolled (दुबार मतदार), Absent (पत्त्यावर आढळून न आलेले), Permanent Shifted (कायमस्वरूपी स्थलांतरित) आणि Dead (मयत) अशा चार प्रमुख वर्गवारीतील मतदारांची यादी संबंधित नगरसेवकांना देण्यात येणार असून, त्यांच्या माध्यमातून प्रत्यक्ष पडताळणी करण्यात येणार असल्याचे स्पष्ट करण्यात आले.

सभेदरम्यान नगरसेवकांनी एसआयआर प्रक्रियेतील अडचणी, सूचना आणि शंका मांडल्या. मुख्याधिकारी शेषराव चौधरी यांनी उपस्थित प्रश्नांचे सविस्तर निरसन करत मतदार यादीतील प्रत्येक नोंद अचूक राहण्यासाठी प्रशासन आणि लोकप्रतिनिधी यांच्यात प्रभावी समन्वय आवश्यक असल्याचे सांगितले.
बैठकीत बीएलओ आणि पर्यवेक्षकांनी आपल्या कार्यक्षेत्रात आतापर्यंत करण्यात आलेल्या कामाचा आढावा सादर केला. दुबार मतदारांची नोंद तपासणे, कायमस्वरूपी स्थलांतरित मतदारांची माहिती अद्ययावत करणे, मयत मतदारांची नावे नियमानुसार वगळणे तसेच पत्त्यावर न सापडलेल्या मतदारांची प्रत्यक्ष पडताळणी या कामांना गती देण्यात येणार असल्याचे यावेळी स्पष्ट करण्यात आले.

यावेळी सर्व नगरसेवकांनी एसआयआर कार्यक्रमाच्या यशस्वी अंमलबजावणीसाठी बीएलओ आणि प्रशासनाला पूर्ण सहकार्य करण्याचे आश्वासन दिले. लोकप्रतिनिधी आणि प्रशासन यांच्या संयुक्त प्रयत्नातून मनमाड शहराची मतदार यादी अधिक विश्वासार्ह आणि पारदर्शक करण्याचा निर्धार या विशेष सभेत व्यक्त करण्यात आला.

सभेस बीएलओ पर्यवेक्षक किरण आहेर, हरीश दाडगे, सुशांत राजगुरू, संजय गवळी, कैलास पाटील, दीपक पांडे यांच्यासह सर्व बीएलओ आणि संबंधित अधिकारी-कर्मचारी उपस्थित होते.मनमाड शहरातील मतदार यादी शुद्धीकरण मोहिमेला या विशेष सभेमुळे नवे बळ मिळाले असून, आगामी निवडणुकांच्या पार्श्वभूमीवर अचूक आणि विश्वासार्ह मतदार यादी तयार करण्याच्या दृष्टीने हा महत्त्वपूर्ण टप्पा मानला जात आहे.