गटार व झाडू कामगारांच्या थकीत वेतनासाठी वंचित बहुजन आघाडी आक्रमक; अतिरिक्त आयुक्तांना निवेदन

 

मालेगाव | प्रतिनिधी.
गटार व झाडू कामगारांचे २८ दिवसांचे थकीत वेतन तातडीने अदा करण्यात यावे, या मागणीसाठी वंचित बहुजन आघाडीच्या पदाधिकाऱ्यांनी आज मालेगाव महानगरपालिकेचे अतिरिक्त आयुक्त श्री. रोहिदास दोरगुळकर यांची भेट घेऊन निवेदन सादर केले.

वंचित बहुजन आघाडीच्या म्हणण्यानुसार, महानगरपालिकेने दिग्विजय इंटरप्राइजेस या ठेकेदारामार्फत गटार व झाडू कामगारांची सेवा घेतली होती. संबंधित ठेकेदाराची मुदत संपूनही कामगारांना २८ दिवसांचे वेतन अद्याप मिळाले नसल्याने अनेक कामगार आर्थिक अडचणीत सापडले आहेत.

या पार्श्वभूमीवर वंचित बहुजन आघाडीने कामगारांच्या न्याय्य हक्कासाठी अतिरिक्त आयुक्तांकडे पाठपुरावा केला. यावेळी अतिरिक्त आयुक्त श्री. रोहिदास दोरगुळकर यांनी पदाधिकाऱ्यांना आश्वासन देताना सांगितले की, ठेक्यावर कार्यरत कर्मचाऱ्यांचे थकीत वेतन अदा केल्याशिवाय दिग्विजय इंटरप्राइजेसला कोणतीही रक्कम अदा केली जाणार नाही. तसेच कामगारांचे थकीत वेतन लवकरात लवकर देण्यासाठी आवश्यक कार्यवाही करण्यात येईल.

या आश्वासनानंतर कामगारांना लवकरच त्यांच्या कष्टाचा मोबदला मिळेल, अशी अपेक्षा वंचित बहुजन आघाडीच्या पदाधिकाऱ्यांनी व्यक्त केली.

यावेळी वंचित बहुजन आघाडीचे जिल्हाध्यक्ष दीपक पवार, वरिष्ठ नेते आनंदजी आधव, शहराध्यक्ष कुणाल पिंपळे, तालुकाध्यक्ष सुनील आहिरे, एकनाथ पगारे, समाधान महिरे, सिद्धार्थ उशिरे आणि सचिन चव्हाण उपस्थित होते.