मनमाड | प्रतिनिधी स्वच्छ भारत अभियानाला अधिक बळकटी देण्याच्या उद्देशाने मनमाड नगरपरिषद आणि भारत पेट्रोलियम कॉर्पोरेशन लिमिटेड (BPCL) यांच्या संयुक्त विद्यमाने स्वच्छता पखवाडा अंतर्गत मनमाड शहरात विशेष स्वच्छता मोहीम उत्साहात राबविण्यात आली.
या मोहिमेत मनमाड नगरपरिषदेचे उपाध्यक्ष, नगरसेवक, मुख्याधिकारी, नगरपरिषदेचे अधिकारी व कर्मचारी तसेच भारत पेट्रोलियम कॉर्पोरेशन लिमिटेडचे चीफ ऑफिसर आणि कंपनीचे अधिकारी-कर्मचारी मोठ्या संख्येने सहभागी झाले. सर्वांनी प्रत्यक्ष श्रमदान करून शहर स्वच्छ, सुंदर आणि निरोगी ठेवण्याचा संदेश नागरिकांना दिला.
यावेळी स्वच्छता मोहिमेत महत्त्वपूर्ण योगदान देणाऱ्या स्वच्छता कर्मचाऱ्यांचा भारत पेट्रोलियम कॉर्पोरेशन लिमिटेडच्या वतीने सन्मान करण्यात आला. कंपनीकडून स्वच्छता कर्मचाऱ्यांना टिफिन बॉक्स तसेच पिण्याच्या पाण्याच्या बाटल्यांचे वाटप करण्यात आले. या उपक्रमाचे स्वच्छता कर्मचाऱ्यांनी स्वागत करत आयोजकांचे आभार मानले.
यावेळी उपस्थित मान्यवरांनी नागरिकांनी शहर स्वच्छ ठेवण्यासाठी स्वतः पुढाकार घ्यावा, कचरा योग्य ठिकाणी टाकावा आणि स्वच्छता ही प्रत्येकाची सामूहिक जबाबदारी असल्याची भावना जोपासावी, असे आवाहन केले. स्वच्छता पखवाड्याच्या निमित्ताने राबविण्यात आलेल्या या उपक्रमामुळे शहरात स्वच्छतेबाबत जनजागृती होण्यास मदत झाली असून, प्रशासन आणि सामाजिक उत्तरदायित्व जपणाऱ्या उद्योगसंस्थांच्या संयुक्त प्रयत्नातून स्वच्छ व सुंदर मनमाड घडविण्याच्या दिशेने हे एक सकारात्मक पाऊल असल्याची भावना उपस्थितांनी व्यक्त केली.
0 टिप्पण्या