मनमाड (प्रतिनिधी): पवित्र रमजान ईद निमित्त नमाज पठणासाठी मनमाड शहरातील आय.यु.डी.पी. परिसरातील नवीन ईदगाह मैदानाची विशेष स्वच्छता मोहीम मनमाड नगरपरिषदेच्या वतीने राबविण्यात आली. मुख्याधिकारी शेषराव चौधरी, नगराध्यक्ष योगेश पाटील, आरोग्य सभापती सौ. पूजा साबळे तसेच आरोग्य निरीक्षक वैभव भामरे यांच्या मार्गदर्शनाखाली ही मोहीम प्रभावीपणे पार पडली.
ईदच्या पार्श्वभूमीवर नागरिकांना स्वच्छ व सुरक्षित वातावरणात नमाज अदा करता यावी, यासाठी प्रशासनाने विशेष लक्ष केंद्रित केले. जेसीबी व स्वच्छता कर्मचाऱ्यांच्या मदतीने मैदानातील कचरा, गवत व इतर अडथळे हटवून परिसर स्वच्छ करण्यात आला.
यावेळी नगराध्यक्ष योगेश पाटील, लोकेश साबळे, सुनिल हांडगे, धनंजय आंधळे, मुस्ताक कुरैशी, नगरसेवक गटनेते महेंद्र सिरसाठ, रफीक शेख यांनी विविध ठिकाणी भेट देत स्वच्छता कामांचा आढावा घेतला. तसेच गॅरेज विभागाचे सतीश चावरिया, दीपक धिवर, जेसीबी चालक सुनील बागुल, प्रदीप धिंगाण, शशी धिंगाण यांच्यासह मोठ्या संख्येने कर्मचारी या मोहिमेत सहभागी झाले होते.
या स्वच्छता उपक्रमाबाबत प्रशासन आणि नागरिकांकडून समाधान व्यक्त करण्यात आले असून, ईदच्या पार्श्वभूमीवर शहरात स्वच्छतेचा आदर्श निर्माण झाल्याची भावना व्यक्त होत आहे.
0 टिप्पण्या