मनमाड | प्रतिनिधी : मनमाड शहरातील पाणीटंचाई दूर करण्याच्या दृष्टीने करंजवण पाणीपुरवठा योजनेअंतर्गत सुरू असलेल्या कामांना आता गती मिळाली असून, शहरातील विविध भागांमध्ये नवीन पाईपलाईनद्वारे पाणीपुरवठा सुरू करण्यात आला आहे. आमदार मा. सुहास अण्णा कांदे यांच्या विशेष प्रयत्नातून ही योजना प्रभावीपणे राबवली जात आहे.
डमरे प्लॉट आणि बोहरी कॉलनी या भागांमध्ये नुकतीच नवीन पाईपलाईन टाकण्यात आली असून, त्यावर नळ कनेक्शन देणे व पाईपलाईन टेस्टिंगची प्रक्रिया पूर्ण करण्यात आली. त्यानंतर आज नगराध्यक्ष . योगेश पाटील यांच्या उपस्थितीत या भागात नवीन पाईपलाईनद्वारे पाणीपुरवठा वितरणाचा शुभारंभ करण्यात आला.
या वेळी नागरिकांनी पूर्ण दाबाने होत असलेल्या पाणीपुरवठ्याबद्दल समाधान व्यक्त करत आमदार सुहास अण्णा कांदे, सौ. अंजुमताई कांदे, फरानदादा खान तसेच नगरपरिषद प्रशासनाचे आभार मानले.
यावेळी नगराध्यक्ष योगेश पाटील यांनी परिसरात फेरफटका मारत नागरिकांशी संवाद साधला. नवीन पाईपलाईनवर घेतलेले नळ कनेक्शन योग्य पद्धतीने घरात बसवावेत, त्यावर तोट्या लावाव्यात तसेच पाण्याचा अपव्यय टाळावा, असे आवाहन त्यांनी केले. मनमाड नगर परिषदेमार्फत पाणीपुरवठ्याचे योग्य नियोजन केले जात असून, नागरिकांनीही सहकार्य करण्याचे आवाहन त्यांनी यावेळी केले.
या कार्यक्रमास सामाजिक कार्यकर्ते लोकेश साबळे, सचिन दरगुडे, करंजवण योजनेचे विभाग प्रमुख मुक्तार शेख, वाल्मन योगेश सांगळे, असिफ सय्यद आदी उपस्थित होते.
0 टिप्पण्या