मनमाड प्रतिनिधी : मनमाड नगर परिषद कडून घरपट्टी, पाणीपट्टी तसेच गाळा भाडे थकबाकी वसुलीसाठी कडक पावले उचलण्यात येत आहेत. वरिष्ठ कार्यालयांकडून वसुलीचे उद्दिष्ट पूर्ण करण्याचे आदेश प्राप्त झाल्यानंतर नगरपरिषद प्रशासनाने अंतिम टप्प्यातील कारवाई सुरू केली आहे.
या मोहिमेच्या पहिल्या टप्प्यात शहरातील ५० हजार रुपयांपेक्षा जास्त थकबाकी असलेल्या नागरिकांना नोटिसा बजावण्यात आल्या आहेत. मात्र नोटीस मिळाल्यानंतरही अनेक थकबाकीदारांनी अद्याप कर भरणा केलेला नसल्याचे नगरपरिषद प्रशासनाच्या निदर्शनास आले आहे.
यामुळे अशा थकबाकीदारांची नावे व थकबाकीची माहिती जाहीरपणे प्रसिद्ध करण्याचा निर्णय नगरपरिषदेकडून घेण्यात आला असून, लवकरच ही यादी सार्वजनिक करण्यात येणार आहे.
याबाबत नागरिकांना आवाहन करताना शेषराव चौधरी (मुख्याधिकारी, मनमाड नगरपरिषद) यांनी सांगितले की, शहरातील नागरिकांनी आपल्या घरपट्टी, पाणीपट्टी तसेच गाळा भाड्याची थकबाकी तातडीने नगरपरिषद कार्यालयात जमा करावी. अन्यथा पुढील कठोर प्रशासकीय कारवाईला सामोरे जावे लागू शकते.
नगरपरिषद प्रशासनाने स्पष्ट केले आहे की, शहराच्या विकासकामांसाठी कर वसुली अत्यंत महत्त्वाची असल्याने थकबाकीदारांविरुद्ध कठोर पावले उचलली जाणार आहेत. त्यामुळे नागरिकांनी वेळेत कर भरून कोणताही कटू प्रसंग टाळावा, असे आवाहन प्रशासनाकडून करण्यात आले आहे.
0 टिप्पण्या