मनमाड: नांदगाव मतदारसंघासाठी ऐतिहासिक क्षण! मनमाड एमआयडीसीला महाराष्ट्र शासनाने अधिकृतपणे औद्योगिक वसाहत म्हणून मान्यता दिली आहे. आमदार सुहास कांदे यांनी पहिल्याच दिवशी दिलेला शब्द पाळत, मनमाड आणि नांदगाव मतदारसंघातील बेरोजगार तरुण-तरुणी तसेच लहान-मोठ्या व्यावसायिकांसाठी रोजगाराच्या नव्या संधी निर्माण करण्याचा मार्ग मोकळा केला आहे.
महाराष्ट्र शासनाच्या उद्योग, ऊर्जा, कामगार व खनीकर्म विभागाने मौजे अनकवाडे आणि सटाणे (ता. नांदगाव, जि. नाशिक) येथील ११९.७९ हेक्टर खाजगी आणि ४.२९ हेक्टर सरकारी जमिनीला औद्योगिक क्षेत्र म्हणून जाहीर केले आहे. शासनाच्या राजपत्रात प्रसिद्ध झालेल्या अधिसूचनेनुसार, महाराष्ट्र औद्योगिक विकास अधिनियम, १९६१ अंतर्गत हा निर्णय घेण्यात आला आहे.
क्षेत्राची चतुःसीमा:
- मौजे अनकवाडे: उत्तरेला गट क्रमांक १४२, १४०, १३९ आणि सटाणे गावची हद्द, दक्षिणेला वसंतनगर (ता. येवला), पूर्वेला वंजारवाडी गावची हद्द, तर पश्चिमेला मनमाड-औरंगाबाद लोहमार्ग आणि अहमदनगर-मनमाड महामार्ग.
- मौजे सटाणे: उत्तरेला गट क्रमांक ७५, मनमाड येथील गट क्रमांक १२७, १२८ आणि मनमाड-सटाणे रस्ता, दक्षिणेला अनकवाडे गावची हद्द, पूर्वेला गट क्रमांक ६५/१, ४५ पैकी, ४०, ९८, ३८, ३७, ३६ आणि नाला, तर पश्चिमेला मनमाड-औरंगाबाद लोहमार्ग.
आमदार सुहास कांदे यांच्या सातत्यपूर्ण पाठपुराव्यामुळे हा निर्णय शक्य झाला असून, यामुळे मनमाडसह नांदगाव मतदारसंघातील असंख्य तरुणांना रोजगाराच्या संधी उपलब्ध होणार आहेत. अनेक वर्षांचे स्वप्न आता प्रत्यक्षात येत असल्याने स्थानिक नागरिकांमध्ये आनंदाचे वातावरण आहे. कांदे यांनी सामान्य जनतेच्या समस्या सोडवण्यासाठी दाखवलेली तळमळ आणि प्रामाणिकपणा यामुळे त्यांचे कौतुक होत आहे. हा निर्णय मनमाड आणि नांदगाव मतदारसंघातील आर्थिक विकासाला चालना देणारा ठरणार असून, लहान-मोठ्या व्यावसायिकांना आणि बेरोजगारांना मोठा आधार मिळणार आहे. मनमाड एमआयडीसीच्या माध्यमातून औद्योगिक विकासाला गती मिळेल आणि स्थानिक अर्थव्यवस्थेला नवसंजीवनी प्राप्त होईल.
0 टिप्पण्या