नाशिक ग्रामीण जिल्ह्यात अवैध व्यवसायांचे समूळ उच्चाटन करण्यासाठी पोलीस अधीक्षक बाळासाहेब पाटील यांच्या आदेशानुसार स्थानिक गुन्हे शाखेने येवला तालुक्यात मोठी कारवाई केली आहे. येवला शहर पोलीस ठाण्याच्या हद्दीतील बाभुळगाव शिवारात गावठाणच्या पडित जागेवर चालणाऱ्या अवैध जुगार अड्ड्यावर स्थानिक गुन्हे शाखेच्या पथकाने छापा टाकला. पोलीस निरीक्षक रविंद्र मगर यांच्या नेतृत्वाखालील पथकाने गोपनीय माहितीच्या आधारे ही कारवाई केली.
या छाप्यात संतोष जगताप (वय 46), बाबासाहेब सुरासे (वय 40), मनोहर आहेर (वय 28), राम भड (वय 29) यांना ताब्यात घेण्यात आले, तर एक आरोपी राज कांबळे फरार झाला आहे. पोलिसांनी 1,09,300 रुपये रोख, दोन कार (ह्युंदाई आय20, मारुती स्विफ्ट), दोन स्प्लेंडर मोटरसायकली आणि मोबाइल फोन असा एकूण 10,50,300 रुपये किंमतीचा मुद्देमाल जप्त केला. ताब्यात घेतलेल्या व्यक्तींविरुद्ध महाराष्ट्र जुगार कायदा कलम 12(अ) अंतर्गत येवला शहर पोलीस ठाण्यात गुन्हा दाखल करण्यात आला आहे.
परप्रांतीयाकडून पिस्तूल जप्त:दुसऱ्या कारवाईत, 3 ऑगस्ट 2025 रोजी स्थानिक गुन्हे शाखेच्या पथकाने येवला शहरातील कोपरगाव रोड परिसरात हॉटेल कैलासजवळ गस्त घालत असताना गोपनीय माहितीच्या आधारे शरबजीत रामलाल यादव (वय 40, मूळ रा. उत्तरप्रदेश) याला ताब्यात घेतले. त्याच्याकडून एक देशी बनावटीचे पिस्तूल आणि दोन जिवंत काडतुसे हस्तगत करण्यात आली.
त्याच्याविरुद्ध भारतीय हत्यार कायदा कलम 3/25 अंतर्गत गुन्हा दाखल करण्यात आला आहे.पोलिसांचे नेतृत्व आणि कारवाई:या कारवाईसाठी पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर आणि तेगबीर सिंह संधू यांच्या मार्गदर्शनाखाली स्थानिक गुन्हे शाखेचे पोलीस निरीक्षक रविंद्र मगर यांच्या पथकाने प्रभावी कामगिरी केली. पथकात पो. प्रकाश भालेराव, गोरक्षनाथ संवत्सरकर, रावसाहेब कांबळे, योगिता काकड, प्रविण काकड, सागर काकड, विश्वनाथ धारबळे, संतोष दोंदे, एकनाथ हळदे, केतन कापसे, हेमंत गिलबिले, प्रदिप बहिरम आणि नितीन गांगुर्डे यांचा समावेश होता.नाशिक ग्रामीण पोलीस दलाच्या या धडाकेबाज कारवाईमुळे अवैध व्यवसायांना चाप बसला असून, परिसरात कायदा व सुव्यवस्था राखण्यासाठी पोलिसांचे प्रयत्न सुरू आहेत.
0 टिप्पण्या