येवला (प्रतिनिधी, एजाज देशमुख): येवला तालुक्यातील पाटोदा ते तळेगाव रस्त्याची अवस्था अत्यंत दयनीय झाली असून, गेल्या अनेक वर्षांपासून रस्त्यावर पडलेल्या खड्ड्यांनी वाहनधारकांचे कंबरडे मोडले आहे. येवला सार्वजनिक बांधकाम विभागाच्या हद्दीतील या रस्त्यावर गेल्या वर्षभरापासून ठेकेदाराने टाकलेले खडीचे गंज जैसे थे पडून असून, रस्त्याचे काम रखडले आहे.
यामुळे वाहनचालकांना रस्त्यातून मार्ग काढताना जीवघेणी कसरत करावी लागत आहे. रस्त्यावरील खड्डे आणि खडीमुळे लहान-मोठे अपघात सातत्याने होत असून, वाहनांचेही मोठ्या प्रमाणात नुकसान होत आहे.विशेष म्हणजे, पाटोदा हद्द संपताच चांदवड सार्वजनिक बांधकाम विभागाने त्यांच्या हद्दीतील रस्ता अत्यंत उत्कृष्ट आणि सुस्थितीत आणला आहे. यामुळे दोन्ही विभागांमधील कामगिरीतील तफावत स्पष्ट दिसून येते. येवला विभागाच्या या ढिसाळ कारभारामुळे परिसरातील जनता आणि या मार्गावरून ये-जा करणारे नागरिक आश्चर्यचकित होत असून, थेट राज्याचे अन्न, नागरी पुरवठा आणि ग्राहक संरक्षणमंत्री तथा येवल्याचे आमदार छगन भुजबळ यांच्यावर नाराजी व्यक्त करत आहेत.
जनतेची मागणी: तातडीने रस्त्याची दुरुस्ती करा
या रस्त्यावरून दररोज शेकडो वाहने ये-जा करतात. मात्र, खड्डे आणि खडीच्या गंजांमुळे प्रवास धोकादायक बनला आहे. स्थानिक नागरिकांनी येवला सार्वजनिक बांधकाम विभागाच्या उदासीनतेवर तीव्र नाराजी व्यक्त केली आहे. "रस्त्यावर खडी टाकून वर्ष उलटले, पण काम पूर्ण झाले नाही. भुजबळ साहेबांनी या रस्त्याकडे लक्ष द्यावे आणि ठेकेदाराला काम पूर्ण करण्याचे आदेश द्यावेत," अशी मागणी नागरिकांनी केली आहे. स्थानिक शेतकरी, व्यापारी आणि विद्यार्थी यांना या रस्त्यामुळे रोजच्या प्रवासात मोठ्या अडचणींचा सामना करावा लागत आहे. खड्ड्यांमुळे वाहनांचे नुकसान तर होतच आहे, शिवाय अपघातांचे प्रमाणही वाढले आहे.
विरोधकांचा टोला: भुजबळांच्या मतदारसंघातच रस्त्यांची ही अवस्था
विरोधी पक्षांनीही या मुद्द्यावरून भुजबळांना लक्ष्य केले आहे. "मंत्रीमहोदयांच्या स्वत:च्या मतदारसंघात रस्त्यांची अशी दुरवस्था आहे, मग इतर ठिकाणी काय परिस्थिती असेल? जनतेच्या पैशातून टाकलेली खडी गंजाच्या स्वरूपात पडून आहे, याला जबाबदार कोण?" असा सवाल विरोधकांनी उपस्थित केला आहे. येवला सार्वजनिक बांधकाम विभागाच्या ढिसाळ नियोजनामुळे रस्त्याचे काम वर्षानुवर्षे रखडले असून, ठेकेदाराच्या निकृष्ट कामगिरीकडे प्रशासनाचे दुर्लक्ष आहे, असा आरोपही होत आहे.
प्रशासन आणि भुजबळ यांच्याकडे जनतेची अपेक्षा
या रस्त्याच्या दुरुस्तीसाठी येवला सार्वजनिक बांधकाम विभागाने तातडीने पावले उचलावीत, अशी मागणी परिसरातील नागरिकांनी केली आहे. "आम्ही दरवर्षी कर भरणार आणि रस्त्यावरून चालताना जीव मुठीत घेऊन प्रवास करायचा का?" असा संतप्त सवाल स्थानिकांनी विचारला आहे. नामदार छगन भुजबळ यांनी स्वत:च्या मतदारसंघातील या गंभीर समस्येकडे तात्काळ लक्ष देऊन, येवला सार्वजनिक बांधकाम विभागाला ठेकेदाराकडून रस्त्याचे काम लवकरात लवकर पूर्ण करण्याचे आदेश द्यावेत, अशी मागणी जोर धरू लागली आहे.
0 टिप्पण्या