मनमाड, दि. २९ मे २०२५: मनमाड शहरातील नगरपालिका हद्दीतील रस्ते, गटारी, सार्वजनिक शौचालये आणि आरोग्याशी संबंधित समस्यांबाबत बहुजन समाज पार्टी (बसपा), मनमाड शहर आणि नांदगाव विधानसभा युनिट यांच्या वतीने नगरपालिका प्रशासक आणि मुख्याधिकाऱ्यांना निवेदन सादर करण्यात आले आहे. बेमोसमी पावसामुळे शहरातील रस्त्यांची दुरावस्था झाली असून, नव्याने बांधलेले रस्ते तुटून खड्ड्यांमध्ये रूपांतरित झाले आहेत. गटारी आणि खड्ड्यांमुळे अनेक प्रभागांचा मुख्य शहराशी संपर्क तुटला आहे, ज्यामुळे नागरिकांना मोठ्या अडचणींचा सामना करावा लागत आहे.
निवेदनात म्हटले आहे की, शहरातील रस्ते, गटारी आणि स्वच्छतेच्या मुलभूत सुविधा पुरवण्यात नगरपालिका अपयशी ठरली आहे, ही बाब अत्यंत खेदजनक आहे. यामुळे सामान्य नागरिक, विशेषत: महिला आणि पुरुष यांना अपघातांचा धोका निर्माण झाला आहे. बसपाने प्रशासनाला सर्व प्रभागांमध्ये सर्व्हे करून रस्ते, गटारी आणि सार्वजनिक शौचालयांच्या दुरुस्तीची मागणी केली आहे, जेणेकरून नागरिकांच्या मूलभूत गरजा पूर्ण होऊ शकतील. तसेच, या समस्यांचे कायमस्वरूपी निराकरण करण्याची कळकळीची विनंती करण्यात आली आहे.
निवेदनात चेतावणी देण्यात आली आहे की, जर प्रशासनाने या समस्यांकडे तातडीने लक्ष दिले नाही, तर बसपा लोकशाही मार्गाने आंदोलन छेडेल, आणि याला मुख्याधिकारी स्वतः जबाबदार असतील. निवेदन सादर करताना बसपाचे नांदगाव विधानसभा अध्यक्ष प्रवीण डी पगारे ,दिपक गायकवाड, गौतम गायकवाड, राजू ठेंगे, तसेच एजाज शेख, शालीग्राम निकम, विशाल पाटील, कैलास गायकवाड, सागर त्रिभुवन, संतोष सोनवणे, बाळू खरे, बाळू आहिरे, प्रवीण मोरे, ऋषभ आहिरे, संतोष गायकवाड, विनोद पटाईत, करन पाटील, राजू श्लोधर, कुणाल अंकुश आणि इतर पदाधिकारी उपस्थित होते.
0 टिप्पण्या