मनमाड, १८ नोव्हेंबर २०२५ : नाशिक जिल्ह्यातील मालेगाव तालुक्यातील डोंगराळे गावात तीन वर्षांच्या निरपराध चिमुकलीवर झालेल्या लैंगिक अत्याचारानंतर दगडाने ठेचून केलेल्या निर्घृण हत्येने संपूर्ण महाराष्ट्र हादरला असताना, मनमाड शहरातील सराफ सुवर्णकार असोसिएशनने या अमानुष कृत्याचा तीव्र निषेध केला. आहिर सुवर्णकार समाजाच्या वतीने शहरातील सर्व सोनार दुकाने बंद ठेवून मूक मोर्चा काढण्यात आला. मोर्चावरील घोषणांमध्ये आरोपीला लवकरात लवकर फाशीची शिक्षा देण्याची जोरदार मागणी करण्यात आली. या घटनेमुळे समाजात भीती आणि संतापाची लाट उसळली असून, पोलिस प्रशासनाने कठोर कारवाई करण्याची मागणी वेग घेतली आहे.
या हृदयद्रावक घटनेने डोंगराळे गाव आणि आसपासच्या परिसरात प्रचंड खळबळ उडाली आहे. प्राथमिक तपासात २४ वर्षीय विजय संजय खैरनार हा गावातीलच तरुण संशयित म्हणून अटकेत घेण्यात आल्याची माहिती मिळाली. या नराधमाने चिमुकलीवर लैंगिक अत्याचार केल्यानंतर पुरावा नष्ट करण्यासाठी तिचे डोके दगडाने ठेचून क्रूरपणे हत्या केल्याचे समोर आले आहे. मृतदेह मालेगाव येथील सामान्य रुग्णालयात पाठवण्यात आला असून, पोलीस घटनेची कसून चौकशी करीत आहेत.
मनमाड सराफ सुवर्णकार असोसिएशनचे पदाधिकारी आहिर सुवर्णकार म्हणाले, "ही घटना मानवी विवेकाला हादरा देणारी आहे. समाजातील अशी राक्षसी प्रवृत्ती मुळापासून उखडून टाकण्यासाठी कठोर कायदे आणि त्याची कठोर अंमलबजावणी आवश्यक आहे. आम्ही या प्रकरणात गुन्हेगारांना कठोरात कठोर शिक्षा होण्यासाठी लढा देऊ." असोसिएशनने शासनाकडे खालील मागण्या मांडल्या:
१. जलद चौकशी आणि अटक : प्रकरणाची निष्पक्ष व पारदर्शक चौकशी करून सर्व संशयितांना तात्काळ अटक करावी.
२. कठोर कलमांचा वापर : भारतीय दंड संहितेतील सर्वात कठोर कलमांखाली गुन्हा दाखल करून त्वरित न्यायप्रक्रिया राबवावी. फाशीची शिक्षा सुनावावी.
३. पीडित कुटुंबाला मदत : चिमुकलीच्या कुटुंबीयांना तातडीने आर्थिक मदत, मानसिक आधार आणि आवश्यक सुरक्षा पुरवावी.
४. सुरक्षा उपाययोजना : परिसरात महिलां व मुलींच्या सुरक्षेसाठी गस्त वाढवावेत, जनजागृती मोहिमा राबवाव्यात आणि सीसीटीव्ही कॅमेर्यांचे जाळे विस्तारावे.
या मोर्च्यात सहभागी झालेल्या व्यापाऱ्यांनी म्हटले, "अशी अमानुष कृत्ये होण्यास आळा घालण्यासाठी पोलीस प्रशासनाने तात्काळ प्रभावी पावले उचलावीत. अन्यथा आम्ही व्यापारी मोर्चा काढून पुन्हा आवाज बुलंद करू." दरम्यान, व्यापारी यांनीही या प्रकरणावर संताप व्यक्त करत, "समाजातील विकृत मानसिकतेला आळा घालण्यासाठी कठोर कारवाई व्हावी," अशी मागणी केली आहे. शासनाने या मागण्या गांभीर्याने घेऊन न्याय देण्याची अपेक्षा आहे.
0 टिप्पण्या