मनमाड पोलिसांची धडक कारवाई: नगरपालिका निवडणुकीपूर्वी अवैध पिस्टलसह तरुणाला अटक

मनमाड, १५ नोव्हेंबर २०२५: आगामी नगरपालिका निवडणुकीच्या पार्श्वभूमीवर अवैध शस्त्रसाठ्यावर मनमाड पोलिसांनी कडक कारवाई सुरू केली असून, विवेकानंद नगरातून २४ वर्षीय कृतिक संजय धिवर याच्याकडून एक देशी बनावटीचे लोखंडी पिस्टल व दोन जिवंत काडतुसे जप्त करण्यात आली. नाशिक ग्रामीण जिल्हा पोलीस अधीक्षक बाळासाहेब पाटील यांच्या निर्देशानुसार ही कारवाई करण्यात आली असून, संशयिताविरुद्ध हत्यार कायदा कलम ३/२५ अंतर्गत गुन्हा दाखल करण्यात आला आहे.

नाशिक ग्रामीण जिल्ह्यात २०२५ च्या नगरपालिका निवडणुकांमुळे गुन्हेगारी रोखण्यासाठी पोलिस प्रशासनाने विशेष मोहीम हाती घेतली आहे. मनमाड शहर पोलीस ठाण्याचे निरीक्षक विजय करे यांच्या नेतृत्वाखालील पथकाने गुप्त माहितीच्या आधारे ही कारवाई केली. येवला उपविभागीय अधिकाऱ्यांच्या लेखी आदेशानुसार संजय धिवर यांच्या घरावर छापा टाकला असता, त्यांचा मुलगा कृतिक धिवर (वय २४) याच्याकडून अवैध शस्त्रे सापडली. पथकात  भारत जाधव, हेमंत भंगाळे,  संदीप झाल्टे, विशाल आव्हाड, रणजित चव्हाण, मयुर पठारे, नितीन मैंद, दीपाली आव्हाड, संगीता वाटपाडे, नितीन पानसरे व बनकर यांचा समावेश होता.

अपर पोलीस अधीक्षक मालेगाव  तेगबिरसिंग सिंधु व उपअधीक्षक मनमाड बाजीराव महाजन यांच्या मार्गदर्शनाखाली ही कारवाई यशस्वी झाली. पोलिसांनी सांगितले की, निवडणुकीच्या कालावधीत अवैध शस्त्रे व गुन्हेगारी रोखण्यासाठी सतर्कता वाढवली असून, नागरिकांनी संशयित माहिती पोलिसांना द्यावी. ही कारवाई सराईत गुन्हेगारांवर नियंत्रण मिळवण्याच्या मोहिमेचा भाग असल्याचे सांगितले जात आहे.