मालेगाव कॅम्प पोलिसांची मोठी कारवाई: 23 चोरीच्या मोटारसायकली जप्त, दोन सराईत आरोपींना अटक

 8.20 लाखांच्या मोटारसायकलींसह मालेगांव शहरातून चोरट्यांचा पर्दाफाश, पोलिसांच्या गुप्त माहितीवर सापळा यशस्वी

मालेगांव कॅम्प पोलीस स्टेशनच्या गुन्हे शोध पथकाने मालेगांव शहर आणि परिसरातून चोरीस गेलेल्या तब्बल 23 मोटारसायकली (अंदाजे 8,20,000 रुपये किमतीच्या) जप्त करून मोठी कारवाई केली आहे. याप्रकरणी दोन सराईत आरोपींना अटक करण्यात आली आहे. मा. पोलीस अधीक्षक श्री. बाळासाहेब पाटील, अपर पोलीस अधीक्षक श्री. तेगबीर सिंग संधू, उपविभागीय पोलीस अधिकारी श्री. सुरज गुंजाळ आणि सहाय्यक पोलीस निरीक्षक श्री. दिपक पाटील यांच्या मार्गदर्शनाखाली ही कारवाई पार पडली.

दिनांक 24 जुलै 2025 रोजी मिळालेल्या गुप्त माहितीच्या आधारे सहाय्यक पोलीस निरीक्षक श्री. दिपक पाटील यांच्या पथकाने डि.के. चौक येथे सापळा रचून मुख्य आरोपी भाऊसाहेब उत्तम चव्हाण (वय 36, रा. सोयगांव, मालेगांव) याला ताब्यात घेतले. त्याच्याकडून जप्त केलेली स्प्लेन्डर प्लस मोटारसायकल चोरीची असल्याची कबुली त्याने दिली. पुढील चौकशीत त्याने 22 मोटारसायकली चोरी करून त्यापैकी 12 मोटारसायकली विक्रीसाठी ठेवल्याची, तर 10 मोटारसायकली त्याचा साथीदार न्हानू भगवान जाधव (वय 24, रा. जैताने, ता. साक्री, जि. नंदुरबार) याला विकल्याची माहिती दिली.

 पोलिसांनी दोन्ही आरोपींकडून एकूण 23 मोटारसायकली जप्त केल्या.ही कारवाई पोलीस हवालदार सचिन गोसावी, हितेश भामरे, रुपचंद पारधी, दिपक हेंबाडे, राजेंद्रसिंग राजपूत, पोलीस शिपाई हर्षल पवार आणि लखन पवार यांनी यशस्वीपणे पार पाडली. सध्या सहाय्यक पोलीस उपनिरीक्षक गुंजाळ यांच्या नेतृत्वाखाली तपास सुरू आहे.

नागरिकांना आवाहन:

ज्या नागरिकांच्या मोटारसायकली चोरी गेलेल्या असतील, त्यांनी मालेगांव कॅम्प पोलीस स्टेशनला भेट देऊन जप्त मोटारसायकलींची पडताळणी करावी आणि आवश्यक कागदपत्रांसह आपली मोटारसायकल ताब्यात घ्यावी. जप्त मोटारसायकलींची यादी पोलीस स्टेशनला उपलब्ध आहे.