पुणे, २२ मे २०२५: मुलशी तालुक्यातील भुकूम येथे १६ मे रोजी २३ वर्षीय विवाहित तरुणी वैष्णवी हगवणे हिच्या आत्महत्येने समाजात खळबळ उडाली आहे. सासरकडील हुंडा छळ आणि कौटुंबिक हिंसाचारामुळे वैष्णवीने गळफास घेऊन जीवन संपवल्याचा आरोप आहे. या प्रकरणात तिच्या सासरच्या मंडळींवर गुन्हे दाखल झाले असून, याप्रकरणी मिस फरहा चॅरिटेबल फाउंडेशन च्या अध्यक्षा डॉ. फरहा अन्वर शेख यांनी कठोर कारवाईची मागणी केली आहे.
डॉ. फरहा अन्वर शेख यांचे निवेदन:
“वैष्णवीचा मृत्यू हा हुंडा प्रथेच्या क्रूर वास्तवाचा पुरावा आहे. ती फक्त एक व्यक्ती नव्हती, तर समाजातील अनेक पीडित महिलांचे प्रतिनिधित्व करणारी होती. या प्रकरणात विशेष न्यायालयात त्वरित खटला चालवावा, आरोपींच्या मालमत्तेची जप्ती करावी आणि हुंडा विरोधी विशेष मोहीम राबवावी,” असे डॉ. शेख यांनी ठणकावले. त्या पुढे म्हणाल्या, “महिलांसाठी मानसिक आरोग्य, कायदेशीर सल्ला आणि संरक्षणाच्या सुविधा तात्काळ उपलब्ध कराव्यात.”
मिस फरहा चॅरिटेबल फाउंडेशनचे पुढील पाऊल:
फाउंडेशनने राज्य महिला आयोग, मुख्यमंत्री कार्यालय आणि गृह विभाग यांच्याकडे लेखी निवेदन पाठवण्याचा निर्णय घेतला आहे. तसेच, हुंडा विरोधात लढणाऱ्या स्वयंसेवी संस्थांना सरकारी सहकार्य आणि निधी मिळावा, अशी मागणीही केली आहे.
डॉ. शेख यांनी समाजाला आवाहन केले की, “आता फक्त संताप व्यक्त करून चालणार नाही. कायदेशीर, सामाजिक आणि राजकीय उपाययोजना राबवून अशा घटनांना आळा घालणे गरजेचे आहे.” वैष्णवीच्या मृत्यूने पुन्हा एकदा हुंडा प्रथेच्या विरोधात कठोर पावले उचलण्याची आवश्यकता अधोरेखित केली आहे.डॉ. फरहा अन्वर शेख, अध्यक्ष, मिस फरहा चॅरिटेबल फाउंडेशन
0 टिप्पण्या