भारतीय रेल्वेचा 172 वा वर्धापन दिन: मनमाड रेल्वेचा ऐतिहासिक वारसा आणि आधुनिक प्रगती

 भारतीय रेल्वेचा 172 वा वर्धापन दिन: मनमाड रेल्वेचा ऐतिहासिक वारसा आणि आधुनिक प्रगती

आज, 16 एप्रिल 2025 रोजी भारतीय रेल्वे आपला 172 वा वर्धापन दिन साजरा करत आहे. 16 एप्रिल 1853 रोजी ठाणे-बोरीबंदर दरम्यान धावलेली पहिली रेल्वे गाडी आज देशाच्या कानाकोपऱ्यात पोहोचली आहे. या ऐतिहासिक प्रवासात मनमाड रेल्वे स्थानकाने मध्यवर्ती भूमिका बजावली आहे. भारतीय रेल्वेच्या या गौरवशाली प्रवासात योगदान देणाऱ्या सर्व कर्मचारी, अधिकारी आणि प्रवाशांना हार्दिक शुभेच्छा!

मनमाड रेल्वेचा गौरवशाली इतिहास

- 1866: मनमाड रेल्वे स्थानकाचे उद्घाटन, ज्याने उत्तर महाराष्ट्राला रेल्वेच्या जाळ्यात जोडले.
- 1905: मध्य रेल्वेचा कारखाना सुरू, ज्याने कोकण रेल्वेसाठी अवघड पूल बांधणीचे काम केले.
- 1928: कारखान्याचे विस्तारीकरण, ज्यामुळे स्थानिक अर्थव्यवस्थेला चालना मिळाली.
- 1968-69: रेल्वे स्थानकाचे विद्युतीकरण, ज्याने आधुनिकतेची नवी पायरी गाठली.

आज मनमाड रेल्वे स्थानक हे मध्य रेल्वेचे महत्त्वाचे जंक्शन आहे. दररोज 25,000 हून अधिक प्रवासी आणि 150 प्रवासी गाड्या तसेच 200 हून अधिक मालवाहतूक गाड्या येथून धावतात. मनमाड-मुंबई पंचवटी एक्सप्रेस, गोदावरी एक्सप्रेस, अजंता एक्सप्रेस यांसारख्या गाड्या मनमाडच्या ओळखीचा भाग आहेत.

आधुनिक सुविधांचा विकास

मनमाड रेल्वे स्थानकाचे आधुनिकीकरण युद्धपातळीवर सुरू आहे. यामध्ये खालील सुविधांचा समावेश आहे:

1. नवीन पादचारी पूल आणि सरकते जिने.

2. लिफ्ट आणि भव्य वाहनतळ.
3. प्रवासी सुरक्षेसाठी सीसीटीव्ही आणि संरक्षण भिंत.
भविष्यातील योजनांचा आलेख
- नवीन पार्सल कार्यालय, भव्य प्रवेशद्वार आणि आधुनिक व्यापार संकुल.
- सर्वसामान्य प्रतीक्षालय, विश्रांतीगृह आणि सिनेमागृह.
- रेल्वे सुरक्षा बल (RPF) आणि रेल्वे पोलिसांसाठी (GRP) सुसज्ज कार्यालय.
- प्रत्येक फलाटावर आरोग्य सेवा केंद्र.
- मनमाड-इंदूर रेल्वे महामार्ग: या प्रकल्पामुळे मनमाडची अर्थव्यवस्था अधिक सक्षम होईल.

मनमाड आणि रेल्वेचे अतुट नाते

मनमाडची 80% अर्थव्यवस्था रेल्वेवर अवलंबून आहे. रेल्वे कारखान्यात 1400 हून अधिक कामगार कार्यरत असून, स्थानकातून कोट्यवधी रुपयांचा मालवाहतूक व्यवहार होतो. दररोज 5,000 हून अधिक चाकरमाने रेल्वेद्वारे प्रवास करतात. रेल्वेने मनमाडच्या सामाजिक, शैक्षणिक, क्रीडा आणि औद्योगिक क्षेत्राला सशक्त केले आहे.

“रेल्वे म्हणजे मनमाड आणि मनमाड म्हणजे रेल्वे, हे नाते माय-लेकराप्रमाणे घट्ट आहे. भारतीय रेल्वेच्या 172 व्या वर्धापन दिनानिमित्त सर्व रेल्वे कर्मचारी, अधिकारी आणि प्रवाशांना हार्दिक शुभेच्छा! मनमाड रेल्वे स्थानक लवकरच मध्य रेल्वेचे सर्वात मोठे टर्मिनस होवो, हीच सदिच्छा!” - नितिन पांडे दक्षिण मध्य रेल्वे सिकंदराबाद क्षेत्रीय समिती सदस्य आणि भाजपा नाशिक जिल्हा उपाध्यक्ष.