मालेगाव: आदिवासी बांधवांचा अन्यायाविरुद्ध एल्गार, अपर पोलीस अधीक्षक कार्यालयासमोर बेमुदत धरणे आंदोलनाचा इशारा

 

मालेगाव: आदिवासी बांधवांचा अन्यायाविरुद्ध एल्गार, अपर पोलीस अधीक्षक कार्यालयासमोर बेमुदत धरणे आंदोलनाचा इशारा

मालेगाव, दि. २५ मार्च २०२५ - मालेगाव शहरातील दौलती शाळेजवळील गट नंबर १०७ मध्ये राहणाऱ्या आदिवासी बांधवांवर झालेल्या अन्यायाच्या विरोधात आता थेट आंदोलनाचा पवित्रा घेण्यात आला आहे. या परिसरातील आदिवासींची घरे भुमाफियांनी मारहाण करत पाडल्याचा आरोप आहे. विशेष म्हणजे, या घटनेनंतर गुन्हेगारांवर कोणतीही कारवाई न होता उलट पीडितांवरच दबाव टाकून भुमाफियांना पाठिंबा दिला जात असल्याचा गंभीर आरोप पीडित जंगलु ढवळु गायकवाड यांनी केला आहे. यामुळे संतापलेल्या आदिवासी बांधवांनी आता अपर पोलीस अधीक्षक तेखबीरसिंग संधु यांच्या कार्यालयासमोर बेमुदत धरणे आंदोलन करण्याचा निर्णय घेतला आहे.

 काय आहे प्रकरण?

गट नंबर १०७ मध्ये राहणाऱ्या आदिवासी कुटुंबांची घरे काही भुमाफियांनी बेकायदा पाडल्याचा दावा पीडितांनी केला आहे. या घटनेत त्यांना मारहाणही करण्यात आली. मात्र, या प्रकरणी पोलिसांनी गुन्हेगारांवर गुन्हे दाखल करण्याऐवजी पीडितांवरच दबाव टाकला. मालेगावच्या पोलीस निरीक्षक गडकरी यांनी घटनास्थळी येऊन आदिवासींना धमकावल्याचा आरोप आहे. "सुप्रीम कोर्टाचा आदेश आहे, तुमची घरे पाडलीच पाहिजेत. मुकाट्याने निघून जा, नाहीतर जेलमध्ये टाकू," अशी धमकी त्यांनी दिल्याचे पीडितांचे म्हणणे आहे. इतकेच नव्हे, तर पाच ते सहा तास पीडितांना कॅम्प पोलीस स्टेशनमध्ये बसवून ठेवण्यात आले.

भुमाफियांना पाठिंबा?

जंगलु ढवळु गायकवाड यांनी प्रशांत पाटील, सुभाष चोरडिया आणि पोलीस निरीक्षक गडकरी यांच्यावर गंभीर आरोप केले आहेत. "या तिघांमुळे आमची घरे पाडली गेली, आम्हाला मारहाण झाली. पण पोलिसांनी आमचे ऐकण्याऐवजी भुमाफियांना वाचवण्याचा प्रयत्न केला," असे त्यांनी सांगितले. या घटनेमुळे भुमाफियांची हिम्मत वाढली असून, ते "आमचे कोणीच काही करू शकत नाही" अशा आविर्भावात मोकाट फिरत असल्याचा दावा पीडितांनी केला आहे.

आंदोलनाची घोषणा

आता सर्व पर्याय संपल्याचे सांगत आदिवासी बांधवांनी लोकशाही मार्गाने आपला आवाज बुलंद करण्याचा निर्णय घेतला आहे. येत्या ३१ मार्च रोजी सकाळी ११ वाजता अपर पोलीस अधीक्षक कार्यालयासमोर (जुने बसस्टँड, मालेगाव) धरणे आंदोलनाला सुरुवात होणार आहे. हे आंदोलन लोकशाही धडक मोर्चाच्या शेखर दादा पगार आणि वंचित बहुजन आघाडी तालुका अध्यक्ष शशिकांतभाऊ पवार यांच्या नेतृत्वाखाली होणार आहे. "आम्हाला न्याय मिळेपर्यंत हे आंदोलन सुरू राहील," असा निर्धार आदिवासी बांधवांनी व्यक्त केला आहे.

प्रशासनाला आव्हान

या आंदोलनाच्या घोषणेमुळे पोलीस प्रशासनावर दबाव वाढला आहे. आदिवासींच्या आरोपांनंतर आता अपर पोलीस अधीक्षक तेखबीरसिंग संधु हे प्रकरणाची चौकशी करून न्याय देतात का, याकडे सर्वांचे लक्ष लागले आहे. मालेगावातील हे प्रकरण आता राजकीय आणि सामाजिक वर्तुळातही चर्चेचा विषय बनले असून, येत्या काही दिवसांत यावर काय कारवाई होते हे पाहणे महत्त्वाचे ठरणार आहे.